بركاتك ياعم الدش..دش زى مانت عاوز

 

 

عذرآ لو كتبت شئ مما اتفق عليه بقلة الحياء أو مما 

يلتصق بقلة ألأدب..فى تقديرى أن ألإثنين شئ واحد لكن إسمحلى أن أطرق موضوع كنا لانستطيع أن نقترب منه أو تقدر تقول حاجة كانت تعرف فيما سبق بممنوع اللمس أو ألإقتراب،لافتة كانت فى وشنا أينما ذهبنا رحنا ولا جينا،كان فى أطراف المنصورة كوبرى صغير كنا نطلق عليه إسم "السلخة" يعنى حاجة كدة مالهاش لون ولاطعم ولا رائحة وقد استقر فى وجدان الدولة البوليسية التى تربى فى أحضانها جيلى ومن جاء بعد ذلك من سيئى الحظ أن كل شئ فى تلك الدولة هو من حرمات الدولة فاستقرت تلك اللافته على المصانع،الكبارى حتى لو كان زى ماقلتلك سلخة صغيرة،المطارات،وزارة الحربية...الخ فى الوقت الذى كانت سماء المحروسة سداح مداح لأقمار أمريكا وروسيا حتى دولة زنجبار..وهى ليست محددة باسم معين ولكنها ترمز لأضعف خلق الله..وقد كان من الغريب أن مصر كلها تم تصويرها والظاهر أن ألأمريكان ودولة فلان وعلان لم تقرأ ممنوع التصوير..تقول إيه ناس لاتعرف القراءة أو الكتابة والظاهر أن الواد عوضين الكمسارى لما كان يقول محطة المطار السرى فى شاوة إحدى قرى الدقهلية كان من جواسيس أمريكا ،ماانت عارف دول ناس مخاويين الجن ويعرفوا دبة النملة؟؟

بعد كدة فوجئنا بالأطباق التى تركب وتستريح على سطوح بيتنا والبيوت اللى جنب بيتنا وأطلقنا عليها الدش وقد تحدث عنها الراحل سعد الدين وهبة (واحد كان عسكرى واشتغل بالأدب والصحافة والفن)بأن هذا الدش إنما هو مستودع للدش؟؟والله كلامك صح وميه ميه ياعم سعد..بينى وبينك هذا الطبق أصبح وعاء للدش والفتة والمهلبية إذا شئت..فبعد أن كنا نستحى أن نقرأ مجرد كلمة عن الملعون الذى يسمى بالجنس وكنا نخفى كتب كامل مهدى تحت اللحاف لنقرأ ليلة الزفاف،وتتصرف إزاى ليلة الدخلة،وكيف تكتب خطاب غرامى؟قال يعنى الواد مايعرفش يكتب إللى جواه من عذاب ولوعة أو حتى يختصر ويقولها باحبك والمسيح الحى بادوب فيكى..محتاج كتاب به أكلاشيهات يطبعها على ورق آزوريه ويعطره بكولونيا الشبراويشى..وبينى وبينك كل برغوت على قد دمه ده كان المتاح لنا أيام الضنك وقلة الفلوس..وكانت ألأحاديث البينية تأخذ كل وقتنا أو كما كنا نقول بنرتاح من المذاكرة وقرفها ..بأن نشطح فى الكلام ..إيه رأيك فى البت الفلانية؟؟يقول ياعم دى مناخيرها فى السما ..على إيه ده كل اللى بتيجى بيه الكلية فستانين لاراحوا ولاجم؟؟

الكلام فى السر ومن يجاهر بكلمة كدة ولا كدة..يبقى قليل ألأدب...تانى قلة ألأدب وقلة الحيا؟؟لكن ده كان نظامنا وتربيتنا..أما فى عصر الدش فالعملية فتحت على الرابع..وأصبح فعلآ  إللى بيختشى..من إيه ياترى؟؟بصراحة من كل حاجة..مايخلفش عيال وكان زمان المثل قاصر على بنت عمى وبنت عمك أما فى عصر الدش فأصبحت بنت عمى وبنت عمك وبنت الجيران وأخت صاحبى ومامة صاحبى مافى مشاكل..وعمتى وخالتك وحاجات كتير ماهو أصبحنا نعيش فى قرية كونية؟؟وعلى رأى بابا صفوت نحن نعيش فى عصر السماوات المفتوحة..لغاية ماتفتحت على دماغك ياعم صفوت أو اتخرمت وسرسبت على ضهرك وضهر إللى خلفوك!!ا

هل السماوات المفتوحة غيرت من سلوك وعادات وخصائص الشخصية المصرية؟؟

الجواب نعم يامحترم وأقدر أقولك إن طبق الدش اللى أصبح عندى وعندك أهم من طبق ألأكل خلانا نلف 180 درجة ..لأ ياربى نلف حول نفسنا ونتهز ونرقص لغاية ماوسطنا ساب،ووقعنا من كتر الهز والغز والذى منه؟؟

فى الجامعة يحكى لى صديق رئيس قسم إدارة ألأعمال بكلية التجارة وطبعآ مش هاقولك كلية إيه ولا جامعة إيه لأنها تبقى بايخة وتوقعنى فى قلة الأدب بلغة زمان،أن الطالب الجامعى النهاردة لازم يعمل "توينز" من زميلاته وإلا يبقى ولا مؤاخذه قفل ومش أى قفل ده قفل ييل يعنى هوه قفل وابوه قفل أما أمه فلا أستطيع أن أجرحها بكلمة وإلا أكون قليل ألأدب ..ا

والواد المفلفل إللى مقطع السمكة وديلها لازم يمشى لآخر المشوار يعنى ربنا يتمم بخير والعاقبة عندكوا فى المسرات..الشقق المفروشة على قفا مين يشيل،والبانسيونات زى الرز،أو لو أضطر ألأمر يأجر شقة مترحين وصالة ولايلزم سوى كنكة وقلة وكباية (القلة  مخلوق غريب وعيت عليه وشفت المقدس أبويا كان يحطها على بقه ويمزمز فى الماء تقولش بيشرب من زجاجة جون ووكر؟ولا الكنج جورج فورث؟؟) ويجتمعا بعد اليوم الجامعى على خير فى شقة حبنا أيا كانت إلى أن يدرك شهرزاد الصباح ويوم ورا يوم يسير القطار بعجلة تناقصية ويرجع للوراء والحقيقة ياسوزى ياحبيبتى أنا ظروفى ماتتحملش نستمر فى الجواز ومعلهش ماعطلكيش ونتقابل بعد كده فى ظروف أحسن ولا ينسى أن يقبل يديها  إعترافآ بقضاء وقت..لأ آسف أوقات ممتعة وكنتى ياسوزى لى خير جليس وأفضل رفيق فى هذا الطريق وباى باى!!ا

وألأدهى من كده ماأصبح يعرف بزواج المحارم؟؟يعنى إيه محارم مالحكاية بقت سداح مداح ماهى أمى دى مش أمى دى حبيبتى و..أشياء أخرى طيب وخالتى وعمتى؟؟مش كلنا أولاد حوا وآدم..ولا إحنا غرب عن بعض ماتأزموش المسائل وخليك إيزى ياعزيزى وبارك الله لمن اشترى سهلآ وبرضه تزوج سهلآ؟؟ياعيب الشوم إنتوا رجعيين للدرجة دى؟؟

وإلى لقاء بعد أن أدركنى ديك البرابر وصاح قوم نام ياأخى إنت صدعتنى ورايا أسعى أجيب أكلى وأكل فراخى ده انت ممل؟؟مين اللى هوه أنا؟؟ ربنا يسامحك أما انت ديك بجد...ا