ألإسم على ألإسم،والإختلاف فى الجســــــــــــــــم

إسمه الوحش وهو إسم على مسمى فالإسم على ألإسم والإختلاف فى الجسم،ومعناة الكلام إذا كنت سهران زى حالاتى وبتبرش بعنيك ومخك بيودى وبيجيب أن هذا الوحش شكله يغم فهو وحش فعلآ والإختلاف فى التنوين كما يقول فقهاء اللغة أما من حيث أنه واد مرعب وبيخوف فانسى لأن الشئ ده عبارة عن بق ودمتم،بيقول كلام كتير وتيجى توزن كلامه تلاقيه مايوزنش ربع كيلو؟؟والظاهر والعلم عند ربنا أن الوحش مفكر نفسه أسد أو سبع وفى الحقيقة لاأسد ولا سبع ده حيالله ويدوبك مراة أسد أو وليفة سبع خلقت للتدليل ليس إلا..تسألنى وانت زعلان ليه من الوحش؟؟أقولك الراجل ده من يوم ماشفته بيتكلم عن ممثل اتهم فى قضية أخلاقية أنه فعلآ هوه كده؟،وأنه سيظهر الدليل المادى عبارة عن سى دى ،ثم طلع كلامه فشنك والظاهر والعلم عند الله أنه كان ياولداه معذور فى قرشين فضحك على الزبون وقاله زى أى محامى :ماتحملش هم أنا هاطلعك من القضية دى زى الشعرة من العجين؟؟بعد ذلك لاالراجل طلع ولاشفنا عجين ولا دياولو!!ا

الوحش بمجرد مارجله فلتت على مجلس ...نسيت ياربى همه بيسموه مجلس إيه؟؟مش مهم هوه مجلس لغاية الوقت لم نرى منه أى فايدة،لا الراجل المخلوع راح بورتو طرة،ولا حلوا أى مشكلة من المشاكل المعضلة اللى الناس عايشة فيها ليل ونهار،والظاهر إن الكرسى والمايك إللى قدام الواحد منهم بيخضهم ويخليهم مايفكروش فى حال الشعب..وصدقنى الراجل اللى باين عليه عنده أنيميا الحديد مش أنيميا البحر المتوسط خلى بالك فيه فرق كبير بينهم زى الفرق بين إسطبل عنتر ومصر القديمة وبين مصر الجديدة..لما هب فى واحد منهم وقاله أقعد!! فكرنى بيوسف بيه أبوحجاج لما كان يشخط فى اللى قدامه ويقوله خسئت عليك اللعنه..وقامت الدنيا ولم تقعد لأن الراجل الممصوص ده قال لإلاه من ألآلهه أقعد؟؟تفتكر الراجل ده كان خبيث الطوية وكان قاصدها؟؟يعنى عارف كويس أنه بيتكلم لواحد نص لبه ويستحق أكتر من كده؟؟

بينى وبينك إللى يستحق كدة الراجل الوحش عاملى فيها قمع ويقولك المواقع ألإباحية ..المواقع الجنسية إحنا شعب لازم نحافظ على هويتنا البزراميطية ،هوية إيه ياراجل ده انت هويتك من كل فيلم أغنية..تقدر تقولى جنسيتك إيه؟؟يارب تنجح فى سؤال سنة سادسة وتجاوب صح..هاتقولى أنا إسلامى مصرى عربى ؟؟هاتلى بلد فى العالم تقول على نفسها الكوكتيل ده ؟؟بينى وبينك ياوحش إللى أختشوا ماتوا وياشاطر روح إلعب بعيد وماتتكلمش كلام تفكر انه كلام كبير وهوه كلام عيال صاقطى سنة سادسة إبتدائى..ياخيبتك القوية

ياجماعة فيه بلاوى متلتلة بيعيشها الكائن الذى كانت هويته مصرى فرعونى،فأصبح ..ولاأقولك بلاش نكرر الكلام إللى بيحرق الدم..شفت برنامج عمرو الليثى على قناة المحور؟؟بنشوف ناس معجونة بمية مشاكل وبتتنفس هموم،وبدل مايطلع من مناخيرها ثانى أوكسيد الكربون بتطلع أغانى زى..ظلموه لخالد الذكر عبد الحليم،أو ياظالمنى للست أم كلثوم طيب الله ثراها وبشبش الطوبة إللى تحت راسها،أو الست عفاف راضى لما تشدو بأغنية مجاريح؟؟ياناس ياهو..ياوحش ،ياعم يابو مقشة،ياأخينا يابو لبدة متحنية وواصلة لغاية النكتة الجذابة التى تتوسط كرش سيادتك..إعمل معروف وعلى رأى الست فلانة الفلانية ..عيب إعمل معروف..عيب مانتش مكسوف إشتغلوا بذمة وراعوا ربنا فى الشعب إللى (إنتخبكوا)وقلتوا الصناديق هيه إللى هتتكلم؟؟ياعم ياللى رفعت إيدك الشمال وقلت إللى مش عاجبه ....وأشار بكف يده إلى خارج المكان يعنى الباب يفوت جمل بلغة مراتك لما تكون متخانقة مع حماتها وبتتلكك لها وعايزاها تغور من خلقتها.ا

أنا فى انتظارك مليت..ياوحش علشان تحل أزمة أنبوبة البوتاجاز لعم حنا جارنا إللى قرر أن يشترى قرن غزال علشان يخطف بالدم والخناق  أنبوبة يطبخ عليها شوية مكرونة قرديحى،وبالمرة إحياة أبوك ماتنساش تفوت على المخبز الآلى إللى حدانا فى الحى وماتلبس نظارة سودة أو طاقية ألإخفاء بقصد عدم رؤية المسخوط اللى مايتسمى رغيف الخبز وطبعآ سيادتك ماتعرفش شكله ولا رسمه ولااتشرفت بمعرفته قبل كده،أصله مكسوف منك لأنك بيه طويل وهايف،وهوه ياحسرة رغيف متاكل قبل كدة بيضحكوا بيه على خلق الله وبيقولولهم كلوا ده نعمة ربنا،وبوسوا إيديكم وش وضهر،إنتوا ماتعرفوش إحنا بندوخ على مانستورد القمح؟؟ماتنساش ياسيادة النائب الوحش أن نصف القمح حشرات ،أقصد حشرات مستوردة مدفوع تمنها بالروبية أو بالروبل وساعات بالدورر؟؟

ياعم إتكسف على دمك وخليك راجل ملو هدومك مش راجل نص كم..وحس على دمك وتعالى زورنى ومتنساش تجيب فى إيدك كام رغيف حلوين من إللى بيجولك ساعة الصبحية من الفرن إياه ،تحب أقولك إسمه إيه العيش ده؟

ياسيدى بيسموه عيش السلطة يعنى الناس الهايلايف..ا

سلام الله على ألأغنام كما شدت أو صدحت الراحلة العظيمة فنانة الشعب الست أم كلثوم،ولو أنى عارف أنه حرام المرأة تغنى لأن صوتها عورة،وكمان الغناء كفر ومهانة للمجتمع وسيتعود على أشياء ليست من صلب الدين فى شئ..وكذلك فالغناء يلهى الناس عن عبادة الرب؟؟

ماتنضف الجمجمة وترجع لعقلك ياعم الحاج

وأخيرآ لاسلام ولا كلام بعد ماقيل أو ماكنت أتمنى أن يقال