ماهو فية حاجات بتضحكنا..أمال بيقولوا مالناش نفس نضحك ليه؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 هههههههههههههههههههههههههههههههههههههههههههه

من ألأنباء ماهو مبكى كحوادث القتل والسحل والإغتصاب أو التحرش الجنسى للفتيات أو الفتيان ،ومنها ماهو مبهج يعنى يخليك تبتسم أو تضحك نص ضحكة ولو كان الخبر جامد شوية يخليك تقهقه ويمكن يخرجك من موود مهبب تكون عشت فيه ولو ساعة ساعتين أو ساعات بتعلق وياك وتكون زعلان مكتئب مهموم مغموم،طيب يكون الحل إيه ياترى؟؟

بعضهم يحب يسمع نكت مرة من واحد صاحبه،أو من صاحب صاحبه،وساعات لاصاحبه ولاأم صاحبه حتى تقدر تخليك تضحك من قلبك..إنما فيه ساعات مشهد سينيمائى ولامؤاخذه أو مقطع فيديو من إختراع جديد بيسموه اليوتيوب تشوفه يخليك تفطس على روحك من الضحك..بينى وبينك مش أى يوتيوب وطبعآ مش واحد عجوز زى العبد لله هيشرحلك يعنى إيه يوتيوب..وبيعرض إيه،وبيشوفوا عليه إيه؟؟

صدقنى اليوتيوب لم أتشرف بمعرفته إلا أخيرآ جدآ،وبينى وبينك شفت عليه فيديو رجعتنى لأيام الصبا والجمال،من الآخر فكرتنى بكتاب كنا نستأجره من عم أحمد بياع الكتب القديمة وكان ألإيجار بالليلة..شلن بالتمام والكمال يعنى خمسة صاغ وفى هاته ألأيام كان الشلن أشترى به كيلو قوطة أو طماطم وفى قول آخر بنادورة..ونصف كيلو سبانخ،وبيضة لزوم الديكور لصينية السبانخ فى الفرن وبالهنا والشفا..ياريتك كنت ويايا كنت تدوق و برضه بالهنا والشفا.ا

طبعآ عاوز تعرف إسم النبى حارسه..الكتاب المعجزة اللى كل شباب مصر وأشبالها ذاكروه من الجلدة للجلدة..وذاكروه بما يرضى الله،ومارسوه علمى وعملى وأظن أنه كان مقرر علينا بس فى منشور سرى صادر عن رابطة شباب مصر فوق 15سنة وتحت 25سنة وبطبيعة الحال كان فيه عيال أفذاذ متفوقين..يطبقوا مااستذكروه بالأمس أو صباحآ فى المساءآ وبالتفصيل الممل؟؟

سيبنا من الكتاب المعجزة والذى كان إسم المدعوق..رجوع الشيخ إلى صباه ونرجع تانى لليو تيوب..إكتشفت أن رجوع الشيخ إلى صباه كان ولامؤاخذة فى دى الكلمة قول كده كى جى وان بالنسبة لليوتيوب،ياعم ده كليه ..لأ ياربى ده جامعة ده أكاديمية لوحده..فيه كل ما تشتهى ألأنفس مما لذ وطاب..الشقرة،والبيضة،أم العيون الخضرة وأم العيون السود..تقولش بامبوظة ياولاد؟؟

وعليه فقد أصبح اليوتيوب مقرر على العبد لله ثلاث مرات فى اليوم كما نكتب على الدواء للمريض..فى الفطار والغدا،والعشاء كمان..وكل مازادت الجرعة كلما زاد المفعول،وانسى ماتعلمناه فى الصيدلة من أن للمادة الفعالة جرعة لها حد أدنى وآخر حد أقصى..طيب الحد ألأدنى لو نقصت عنه الجرعة يجرى إيه؟؟لايكون للدواء فايدة..وكأنك يابدر لارحت ولا جيت؟؟وعلى فكرة ده مثل حدانا فى أرياف المنصورة ..طيب يافصيح لو زادت الجرعة ؟؟ممكن تقع من طولك لو حظك العثر رماك فى سكة دواء حساس تكون الجرعة الزائدة منه توديك فى داهية وممكن نقرأ إسم المحروس فى الصفحة قبل ألأخيرة فى جريدة ألأهرام الغراء!ا

نرجع تانى لليوتيوب وبلاويه..بس بينى وبينك كلما تناولت جرعة من المذكور إزددت إحساسآ بالشباب يغلفنى وبالمرح والسعادة تهدهدنى..وساعات أقول شعر حلمنتيشى..وساعات بعدها أدخل الحمام وأغنى ..ومن حسن حظك أنك لم تسمعنى فصوتى أجش ولم يسمعه أحد غيرى حتى ألآن ..يمكن لو كان سمعه اللواء الدكتور عبد الوهاب كان نفحنى النيشان الذى كان يهديه لكل من لايعجبه صوته ثم يقول..هباب بضم الهاء وفتح الباء وتسكين الباء الأخيرة..دى كانت طريقته ومن حقه يقول زى ماهو عاوز..والا أنت رأيك إيه؟؟

أما ما جعلنى أرقص سامبا..وأغنى سودانى كالمامبو السودانى وأضحك لغاية ماحصل حاجة كدة مايصحش أقولك عليها..لأنها لاتحدث إلا فى ألغرف المغلقة وبينك وبين نفسك..مارأيته على المذكور أعلاه لشيخ له مقشة يتجاوز طولها 25سم سنتى ينطح سنتى..وفى عقر دار مجلس الشعب يؤذن ..ويبدو أن ألأخ الفقيد عايش فى الدور حبتين وأخذته الجلالة..فتثنى يمينآ،ثم تلوى يسارآ فى حركات ذات ريتم معروف لايحدث إلا فى حلقات الذكر ممن يهيمون بذكر اللى بالى بالك ،مشهد فريد جعلنى أضحك من كل قلبى..وأبكى بكل جارحة من جوارح عقلى..ألهذا الحد تهوى مصر الفرعونية فى غياهب الوهم وشطحات الدجل ؟؟

بذمتك لو كان لك نصيب أو حظ من الدنيا وشاهدت ماشاهدت ماذا سيكون رد فعلك؟؟ هل ستضحك مثلى على ماتردت إليه مصر من شعوذة يقوم بها من يمثلون شعبها ويتحسسوس آلامه ويبنون له آماله ؟؟

عليه العوض ومنه العوض...دنيــــــــــــــــــــــــــــــــــــــــــا