أنا مؤسس حزب مصر الكومى ..وإسم الدلع ..طـــــــــــــــــــــز

 

 

بعضهم غاوى يركب حصان أبيض ويمسك فى إيده سيف بيبرق ،بيلمع يعنى ويتصور نفسه بيجرى وهو راكب فوق الحصان ويقولك أى حاجة..واحد يقولك نص بنات البلد كانت بتموت وبتتخانق عليه،وواحد تانى يقولك ده أنا كنت مشيب البلد بتاعتى ومحدش يقدر ينزل كلمتى ألأرض،واحد تالت يقولك أنا كنت ألأول فى المدرسة على العيال زمايلى،وبينى وبينك لم يعجبنى اليومين دول سوى اللى يقولك أصل أنا إللى فجرت الثورة؟؟وبالذات واحد أفتكر انه خريج كلية علاج ألأمراض النفسية والإستهبالية فرع نبروه ولو ماكنتش عارف أين تقع نبروه أدخل على جوجل إيرث هتلاقيها بحجم النملة حتى لو كنت لابس نظارة  كعب كباية،المهم مش فى نبروه المهم فى البلاوى اللى بتتحدف علينا منها،وساعات بلوة من البلاوى تقدر عليها وعلى همها وتغور ويادار مادخلك شر،وساعات تصدعك ليل ونهار ولو أحدت كل أدوية الصيدليات مايحوقش فيها!!ا

أنا شخصيآ جربت كل أدوية ضد الحساسية لما باسمع الراجل ده وهوه راكب الحصان إياه ويقولك إنتوا ماتعرفوش إن أنا أول واحد فجر ثورة 25 يناير؟؟

ربنا يحرسك لماما اللى ورثت أبوها الباشا وانت ضيعت ورثها مرة على قناة الملاعين،ومرة على حزب مصر الكومى اللى مافلحتش تكسب فيه كرسى تقعد عليه فى البرلمان؟؟وتلاقيك قاعد الوقت على الرصيف بتاكل حلابسة وتبلع بمية طرشى من عند البت إللى بتبيع الطرشى على ناصية بيتكو!!ا

ده واحد من الناس ،العبد لله قابل من الماركة دى كتير وقدرت أتعامل معاهم بكلمة واحدة هى كلمة طز..كلمة تريحك من وجع الدماغ وتسد عليك الريح وطز جربتها مع المدير بتاعى وكان راجل حرامى بيسرق من المكان اللى كنا بنشتغل فيه..أصله مال سايب ..ماعلينا حاولت أعمل أبوعلى اتبهدلت فلقيت إن أحسن حاجة أطنش وقلت ياواد...طز ومشيت جنب الحيط بينى وبينك إرتحت وأخدت الكام لحلوح وحوافزى ميه ميه...طيب أنا عاوز إيه أكتر من كده؟؟

ووجدت بخبرتى المتواضعة أن لما تطنش تكون أقوى راجل فى الدنيا..بشرط تقول طز.ا

ومن فرط إقتاعى بطز فكرت أن أكون حزب وعصرت مخى أسميه إيه ياترى ولم أجد غير إسم حزب طز الكومى..غير أنى خفت أحسن أتكوم زى أخونا الفقيد وأقعد جنبه على الرصيف آكل بعليصة وأحلى بالحلابيسة..يمكن ألأيام تخيب ظنى وأقدر أرشح نفسى لرياسة الجمهورية..ماهى بقت سايبة أو سداح مداح..تلاقى أبودقن بيرشح نفسه،وأبومقشة بيرشح نفسه،وبكرة تلاقى أبولحاف وأبو زمارة وهذه علامة فارقة من علامات الديموكراتية،لكن إحنا إللى مش فاهمين حاجة فى أى حاجة؟؟

طيب لما هانجح فى الإنتخابات حيث قدمت للملاليم الغفيرة برنامجى الذى يتلخص فى كلمة واحدة..طز،بدلآ ممن كانوا يتبنون برنامج ماقل ودل..أظنك عارفه وحفظته عن ظهر قلب..ألإعلام هو الحل..ربنا يحل وسطكوا ياأصحاب المقشات المقملة..ياللى بكرة تكتشفوا أن العقارب والسحالى معششة فى المقشات التى تحملونها على وجوهكم السمحة الكئيبة الغريبة ،صدقنى كل ما أنظر لواحد منهم وهوه شايل المقشة بتاعته أتوهم أنها مليانة بالبترودولار..الذى فتحوا به محلات للبس المحجبات،وآخر للتوليد والبخور  بالذمة دى بلد عمرها 7آلاف سنة..الله يرحمك ياسادات..كنت لما متلاقيش حاجة تقولها تعدى على 7آلاف سنة قال يعنى تايهة ولقاها.ا

حزب طز ستجد فيه الحل ألأمثل لمشاكل المحروسة..التى أصبحت كطبق العجين بعد أن كانت فى يوم من ألأيام كطبق الأسباجتى الذى يمكن أن تسحب منه واحدة واحدة لتتعامل معها بمختلف الحلول..أما اليوم فستجد فى هذه الكلمة السحرية حلآ لأزمة البوتاجاز..حلآ لمشكلة البنزين..حلآ لمشكلة رغيف العيش التى ستحل علينا ضيفآ ثقيل الدم بعد 5أشهر فقط..وكذلك حلآ لمن يركب حمارآ أعرج وهو يجرى بسرعة الصاروخ ليقول لك انتخبونى أنا مؤسس حزب طز الكومى..باباى نتقابل فى موقعة ألإنتخابات ومتنساش حزب طز الكومى..قول يارب