Tuesday, January 29, 2013

باطل..باطل..باطل؟؟

وبالتاكيد ياعم الحاج محمد لما زرت الديار المقدسة،وبالتاكيد قبلت الحجر ألأسود أو الأسعد وأظنها لاتفرق فأحمد هوه هوه الحاج أحمد،وعلى رأى شاعر ابن ناس طيبين زيك كده قال زمان خمسة بصل وبصل بخمسة؟؟ ودعيت بالتأكيد (خلى بالك من بالتأكيد)لأن لها موقع محترم من ألإعراب..على المعارضة التى طلعت السل فى عنين سيادتك،ومن جهة أخرى دعوت الله أن يلهمك الصواب وأن يسدد خطاك ،وبالمرة أن يجعل عظمة المرشد راضى كل الرضا عن معاليك..ورجعت للديار كالفارس المغوار،متأكدآ(وليست بالتأكيد)أن الله سيسمع الدعاء،وسيرفع الجهد والبلاء،وسينزل من السماء كسفآ على كل من هو ليس من ألأهل والخلان أو العشيرة أو الجدعان..ثم ماذا حدث ياعم الحاج ياعياط؟؟
لم يستجب الرب لك بل أرسل طيرآ أبابيل على أم رأس الجماعة وليشحور عقل عظمة المرشد الذى يقال والعهدة على الراوى أنه مخاوى الجن..وبيحضر العفاريت قبل كل قرار يلزمك به أو ينفثه لك فهو كالحية الرقطاء ينفث السم من فمه ليشع السم فى قلوب وصدور الشعب الذى يتوهم أنه الخليفة المختار والذى أرسلته العناية ألإلهية له كى يقوم بحكمه أو التحكم فيه ؟؟
العبد لله أو كما يقول المسلمون تواضعآ أو ترفعآ الفقير إلى الله..آل يعنى الواد زاهد فى الدنيا وتلاقيه عاكم على كام مليون ولابد فى الدره ويقولك الفقير إلى الله..ربنا ياخدك ويسيب فخدك ياشيخ...ا
عاصرت حكم مولانا المعظم فاروق الأول حفظه الله وعظمت له كل صباح وقلت "عاش ملك مصر والسودان"،ثم جاء من بعده الصعيدى الرادل ابن الرادل ابن عم عبد الناصر أو كما يقول الصعيدى ولد عبد الناصر الذى لبس الشعب المصرى الطرح والملايات وباع دهب مصر،وسرحنا على الغربيات نبيع البلح ألأمهات وطقت فى دماغه أنه امبراطور ألأمة العربية؟؟وأشاع فى المشاع أن الملك السارق فاروق(شوف ياأخى الأفترى)كان راجل هلاس وبتاع نسوان...والنهاردة طلع أنه كان عنين..وطبعآ لاتحتاج عظمتك لأن أقول أو أن أشرح لك كلمة عنين يعنى إيه..أصل الفياجرا لم تكن قد ظهرت بعد يعنى اللى كان يتنيل على عينه قول إيدك منه وألأرض وامراته تصوت وتقول للجيران مش عارف إيه..ثم جاء من بعد عبد اللاوى الرئيس المؤمن محمد أنور الساداتى الذى غير إسمه إلى السادات؟؟طيب ليه يابابا أنور تغير إسمك ؟؟ولا أتذكر أنه قد نشر إعلانآ فى جريدة ألأهرام الغراء بما يفيد أنه قد غير إسمه ومن يعترض عليه أن يتقدم فى خلال 15يوم بالتمام والكمال حتى لايكون عليه شيك أو كمبيالة ويضيع حق صاحبها..الحكاية مش كدة..الحكاية أن الرئيس المؤمن أراد أن يوهم الشعب المصرى الكريم بأن له نسبآ أو قرابة أو أنه ينحدر من سلالة الشيخ السادات أحد علماء الجامع ألأزهر فى عهد ساكن الجنان محمد على باشا؟؟يانهار اسود واسود كمان من قرون الخروب ياجدعان..يعنى الحكاية تزوير فى تزوير أو ضحك على دقون البشر؟؟
الذى جاء بعده الفريق أول محمد حسنى السيد الذى نهب مصر وكان يسرق وهو يبتسم..وكان نفسى أسأله بتبتسم ليه ؟؟وأظنه كان سيقول لى ده أنا مارضيتش أضحك أو أقهقه حتى أستلقى على قفايا..وبغباء شديد أسأله وعلى وجهى علامات البلاهة لأقول له ليه؟؟ فيجيب :لأنى كنت باسرق وأحط الفلوس فى بنوك زيورخ،وبال..ومابالشى والشعب بيصفق لى ويقولى:بالروح بالدم نفديك يامبارك...واخد بالك يامبارك من الكلام أو السرح اللى كان بيقوله الرئيس المفدى؟؟
ثم عاصرت الراجل بتاع ربنا..أللى الناس حلموا بأن رسول المسلمين قال لهم عضوا عليه بالنواجذ..الراجل ده اختارته العناية ألإلهية ليكون والى مصر أو خليفة المحروسة..يافرحتى ياسعدى ياهنايا..ا
ويخبطنى الواد الحليوة اللى قاعد جنبى ليقول لى ماتفوق ياجورج إنت قاعد تدش وتجيب من هنا وتودى هناك ولاأعرف انت قصدك إيه؟؟
أتمطى وأتمتطع وأطأطأ رقبتى وأفرد طولى لأقول له..أصلك غبى ..إنت من الجماعة إياها ياد؟؟أنا باقول الكلام ده والرغى ده كله علشان أوصل لسيادتك أن شعب مصر المختار طول عمره حكامه بيضحكوا عليه ويتمزجون جدآ حين يعطوه ألجولدن فينجر سواء من فوق الهدوم أو من تحت ألأندر مابتفرقش المهم يصل المذكور ثم يخرج الشعب ليقول باطل..باطل..باطل..باطل..باطل؟؟
هوه إيه اللى باطل؟؟وحياة أبوك تقوللى أحسن كل حاجة باعتبرها باطل ..الحكم باطل..الريس باطل..المرشد باطل..نائب المرشد باطل..رئيس مجلس ألأكل السابق باطل..رئيس الحزب المكروه باطل..وانا وانت بطالين
وآآآآآآه يابلد

Wednesday, January 9, 2013

وهوه لامؤاخذة..جماعة لامؤاخذة يلزمهم دروس خصوصية؟؟

معلهش ولو أنى دربت نفسى كثيرآ على عدم حشر هذه الكلمة بمناسبة أو بدون مناسبة فى الكلام الحياتى اليومى بينى وبين نفسى وبينى وبين ألآخرين فهى كلمة يتميز بها الشعب المصرى ولا يتفوق عليه سواه بين شعوب ألأرض وأنت تعلم أكثر منى أى المواضع تنحشر هذه الكلمة ومتى..والحقيقة أنها بمناسبة وبدون مناسبة تنط على شفايفنا هذه الكلمة لنصبح شعبآ متراخيآ وغير منضبط وكسول ومفرط فى حقوقه وينسى واجباته وكل هذا بسبب معلهش!!ا
معلهش...معلهش غصب عنى قلتها..وأوعدك أنى لن تنبس شفتاى بهذه الكلمة بعد..سوف اكون غاية فى الغلاسة،وقمة فى الرزالة،وفقير فى ألأدب والأخلاق وكل هذا بمنطق من يختلف معى أو يتعارض 
مع أفكارى لأنى سألقى عليك قولآ ثقيلآ؟؟
الحكاية ومافيها أنى انطسيت على الصبح بخبر خلانى أفرك عنيه علشان أقرأه مرة تانية،وتالته كمان لأنه من وجهة نظرى خبر يستحق ماتعدى عليه،أو كما يقول أهل البادية أو ذوى اللحى..أن تمر عليه مر الكرام..الخبر يقع فى سطر ونص قرأته فى جريدة اليوم السابع ويقول أن البرازيل أعدت دورات تثقيفية فى اللغة ألانجليزية..إلى هنا والخبر عادى ،يمكن يكون لطلبة المدارس إللى واقعين فى اللغة ألأجنبية زى حالتنا كده،أو من باب من تعلم لغة قوم أمن شر مكرهم،أو من باب تانى ماهى ألأبواب كتير والحمد لله،أطلبوا العلم ولو فى الصين...ا
لأ ياسيدى لالطلبة المدارس ولا للعواجيز اللى زى حالاتى حتى تقول لى بعد ماشاب ودوه الكتاب على رأى المثل..ولكن الجمهور المستهدف ياسيد هو جمهور البغايا..أيوه البغايا..يعنى البروستيتيوت ..يعنى مايعرفوا عندنا نحن أصحاب الشعوب الناهضة المسلمة..ذوى الحياء والدين..بالساقطات؟؟
طيب ليه يامولانا تعمل دورات تثقيفية للبغايا؟؟وهمه ناقصين ثقافة؟؟دول يعلموا شعوب ..وأمم..دول عليهم شوية ثقافة ماتخرش الميه؟؟يجيب الواد البرازيلى لافض فوه بأن الشئ لزوم الشئ...معلهش...يادى المصيبة لسانى فلت منى وقلت معلهش ..نفوتها دى ،وأسأله وتقاسيم وجهى البلهاء تسبقنى فى السؤال وتنتظر على أحر من الجمر الجواب يامحترم؟؟
الجواب هو أن هذه الدورات التدريبيه هى جزء لايتجزأ من ألأستعداد الذى يجرى على قدم وساق للدورة الأوليمبية التى ستعقد هناك وسيطأ أرض البرازيل أمم وأغراب يتحدثون اللغة ألإنجليزية وعليه فيلزم أن تكون بغايا البلد على دراية وعلم وأن تكن حاذقات باللغة التى يعرفها الغريب حيث يتم الكلام والحديت وياه بها على ألأقل أثناء ألإتفاق ..وبيع المنتج الذى يعد أقدم منتج فى التاريخ للضيوف ألأعزاء...ياااه ياولاد اللذين..والذى واللاتى؟؟حتى الدعارة فكرتوا فى ألإستعداد الممنهج والمخطط لها سلفآ؟؟
بينى وبينك أنا احترمت الناس دول..على الونجين..الونج ألأول الحكومة البرازيلية التى تستعد وتفكر فى تحقيق مزاج ورفاهية وسعادة الضيوف ألأعزاء،وثانى المنجين هو ألإخلاص والتفانى من قبل العاهراتن للمهنة التى يتم عن طريقها إسعاد الضيوف..وسهولة الحديث ..وحديث يجر حديث..وسطبعآ ساعة الحظ مابتتعوضش ..حتى يخرجوا من البرازيل وهم يحملون ذكريات ستظل فى ذاكرتهم إلى ألأبد..بها مالذ وطاب وأن يقرروا فى معرض أحاديثهم مع ألأهل والخلان..أن البرازيل أجدع بلد فى العالم..ده حتى نسوانها ياجدع عليهم شوية إخلاص مش موجودين ولا فى اليابان أو حتى فى ألمانيا..دول بيتكلموا إنجليزى يامرسى زى اللبلب..وفهمونا وفهمناهم وبسطونا وبسطناهم...وعجبى
وللحديث بقية إن كان فى العمر بقية..ا  
 

Tuesday, January 8, 2013

ضحكتنى والله ياحاج محمد..ياعياط

دى حاجة تجن ياجدع؟؟آه والله  الرئيس وطبعآ مش الرئيس أوباما رئيس أكبر عسكرى فى العالم ولا الرئيس البشير خاقان السودان لاسمح الله أنا قاصد رئيسنا المفدى..أظنك ماتوعاش على كلمة المفدى دى؟؟أصلها كلمة كنا نسمعها تقال للمليك المفدى فاروق ألأول ملك مصر والسودان...وفلسطين إذا أمكن ..إحنا خاسرانين حاجة ماهو بيتقال كلام إللى هوه ابن عم حديت..وقول ياباسط..وساعات كنا نسمعهم فى ألإذاعة يقولوا الرئيس المفدى صاحب المقام الرفيع مصطفى النحاس باشا....ياااه كانت أيام كلها هدوء والناس بتحب بعضيها..ومحدش كان بيعترض لما يسمع كلمة الملك المفدى..أما لو قلتلى النهاردة مثلآ..وأنا باقول مثلآ..الرئيس المفدى محمد مرسى العياط..أعتقد والعلم عند الله أن بعض الكلام سأسمعه والبعض ألآخر هيعدى من ورا ودنى وكأنك يابوزيد ماغزيت؟؟
تسألنى ليه؟ليه أنا باعتبر كلمة الرئيس المفدى مرسى العياط  كلمة نشاز أو من العيار الثقيل التى لو مست طبلة أذنى لتهتكت إربآ إربا؟؟
ثبت ياسادة ياكرام أن الحاكم الذى يلبس جلابية أبولمعة ويفتح على الرابع ويقول كلام مايدخلش العقل..أو يمشى من الفهامة أو السلطانية اللى كل مصرى لابسها فوق دماغه وعاملة ولامؤاخذة زى الرادار..وساعات يقولوا ده إحنا بنفهمها وهيه طايرة..شعب بخفة الدم دى لايفوت عليه أن يعرف أن الكلام اللى بيسمعه ده كله فشر..وتمييس..ومضغ..واضحك ياشاطر والله ماقصدى البيه الشاطر بتاع الزيتون والجبنة وأكل القطط والكلاب اللىاستورده من أور  شلوم (مدينة السلام )على حد تانى ..ده احنا بنعرف الكفت وماتكذبش علينا إحياة أبوك تانى؟؟
الحكاية انى اتفشخ بقى من الضحك لما سمعت إن الرئيس المفدى محمد مرسى العياط صرح بعد ألإجتماع الميمون الذى حصل بينه وبين الخواجات بتوع الصندوق إياه اللى مش هايوردوا على جنة ربنا علشان بيسلفوا الدول الغلبانة بالفايظ..يعنى بالربا..يعنى بالفوايد..اللى هيه حاجة كدة زى العوايد..وفيما سبق ونفتكر إن الرئيس المفدى صال وجال تحت قبة البرلمان فى العهد السارق لما كانت الدولة هتستلف قرشين من الصندوق..وقال أن ألإسلام والله قد حلل البيع وحرم الربا..وياناس ياشر هاتوها البر وماتستلفوش بالربا لأن ده حرام..وربنا مش هايبارك لكم لا فى أولادكوا..ولا فى أموالكوا..وبقدرة قادر ياأخى أصبح السلف حلال والفوايد أصبحت مصاريف إدارية..وحاجة زى كدة؟؟شوف ياأخى..دى كيميا دى ياولاد..لأ أظنها سيميا..بص شوف البيضة جواها كتكوت..والكتكوت بينزل بيضة..ياحلاوة ياولاد..؟؟
إللى حرق دمى ياأخى إن الرئيس المفدى بيقول إننا آه هنستلف من صندوق النقد الدولى لكن إيه يارجالة بدون مانخضع لأى شروط؟؟؟
والله ضحكتنى ياحاج محمد؟؟ليه هوه الصندوق عاشقنا فى الضلمة؟؟ولا هيدينا فلوس علشان سواد عنينا؟؟
ياحاج محمد ده الكذب حرام واللى بيكذب بيخش النار..ولا علشان خاطر عيونك هتكون النار زى نار ابراهيم وسيقول لها الرب يانار ماتحرقيش مؤمن ده الحاج محمد بتاعنا أو بتاع ربنا؟؟يانار كونى بردآ وسلامآ على محمد..ومحمد أخو ابراهيم وابراهيم أخو عباس وكله عند العرب صابون...وأرجوك أوعى تتزحلق فى صابونة

لازم أنكسف على دمى وأهنى الثمانية أصحاب اللحى الموظفين بدرجة وزير

إمبارح عيدت وهنيت،والنهاردة لازم أنكسف على دمى وده بفرض إن لسه عندى دم وأبارك للثمانية الكبار الموظفين بدرجة وزير وبينى وبينك لايوجد فرق بين الوزير المنتمى للجماعة إللى محدش عارف لها أم ولا أب يعنى بصراحة الجماعة اللقيطة والتى كان .النظام السارق ألله يرحمه ويرحم أيامه ...بيقول عليها الجماعة المعذورة قصدى الجماعة المحظورة؟؟ وبين الزير اللى كانت ستى ماتيلده تغسله وتبخره وتمبيه ماء زلال كى نشرب ماءآ طهورا..وليس ماءآ معجونآ برائحة الخرفان وتسألنى ليه بأقول على النظام السابق  الله يرحم أيامه؟؟هل أنا الدم الذى يجرى فى عروقى دم فلول لاسمح الله،أو من هيئة المنتفعين بالعز أو من بطانة أحمد عز؟؟
لسبب واحد أتمنى أن تذكره كحسنة لنظام مبارك،هو أن قيمة المدعوق اللى إسمه الجنيه المصرى كان بيتنفس ويشم شوية هوا ويقدر يطلع لسانه لعملات غيره على مائدة العملات العالمية؟؟
ياسادة يالئام يامن تحيلون ألأبيض أسودآ على دماغكوا ودماغ مرشدكم العبيط..لقد ترك مبارك الحكم فى 11فبراير 2011وسعر الدورار 5.41جنيه ينطح جنيه..واليوم من تلك ألأيام السوداء التى نعيشها الدورر ب6.78جنيه  وزغرطى ياللى مانتيش غرمانة..وشوبش يامرسى..يارجل ألإقتصاد،ويا رجل والرجال قليل؟؟ربنا يوقف نموكوا زى ماوقف إقتصاد مصر قولوا آمين.ا
لله فى لله عندى حساسية لما باسمع سيرتهم،أو لما باشوف ألأفندى إللى مش متغطى طالع تصريحات نازل بذاءات فى خلق الله تقولش مش مصدق عقله من المطب اللى واقع فيه ومفكر نفسه إن الناس بتدوب فى تراب رجليه؟؟ده الناس بتكرهك ياعريان يافقير السسجايا ومنبع الكذب والبهتان!!
والا الراجل بقلظ بتاع النبات إللى عامل زى شجرة اللبخ؟؟وزع العطايا قبل الأنتخابات واتمطع وقال لما رفيق الكفاح المدعو اللى مش متغطى سقط فى انتخابات الحزب فقال لافض فوه:ا
هنشوفله رئيس مجلس شعب بعد ألإنتخابات اللى جاية؟؟جتك ستين نيلة يانخلة مقمعة،ياشجرة مفرغة..ياكوبرى المعدية ياإبرة مصدية..خلاص ظهرت النتيجة وكتبتله الخطاب اللى هايقوله تمامآ زى الخطاب اللى كنت كتبته فى الجلسة ألإفتتاحية لمجلس الأكل السابق..وكنت حاطه فى جيب الساعة بتاعة عزتك بتاع الله أكبر وبتاع بما لايخالف شرع الله؟؟
ياناس انكسفوا على دمكوا والا انتوا إتعديتوا منى ومابقاش عندكوا دم زى حالاتى فأصبحت متبلد الإحساس لاأسمع،لاأرى،لاأتكلم يعنى بصراحة جهازى العصبى فقد إستجابته للبيئة المهببة اللى عايشين جواها وأصبحنا نتنفس كذبآ،ونسمع لغوآ ،ونرى قوالب عفنة إسمها الخرفان
ماتيجوا ندبحهم ونرتاح منهم ونوزع لحمتهم على القطط والكلاب؟؟تيجى نيجى؟؟يالله نيله

Monday, January 7, 2013

لازم أقول لك ولكل مصر :كل سنة واحنا بخير وفى حب