وهو أحد السادة اللئام الذين لاألومهم بل أرثى لحالهم وحال من ترك لهم اللجام فطاحوا فى ألأرض فسادآ...وأكلوا عقول البشر..واستخفوهم فأطاعوهم...!ا
ياناس ياهوه الراجل ده هيجننى وأنا مش ناقص أتنازل عن الربع الخالى الذى تبقى فى دماغى حتى أستمع لكلام السيد أجروب يمتعنا ويشنف آذاننا بما أفاء الله عليه من هلوسة وترالالى من النوع الفخم..بكسر الخاء وفتح الفاء...والله أعلم لأنى نسيت عم الشيخ الذى كان يشنف آذاننا هو ألآخر ويمسك بأم على فى يده اليسرى ويكتب باليد اليمنى وياويله ياسواد ليله لما واحد يعرب خطأ...لأ مش ممكن يخطئ الفسل فى قواعد النحو؟؟؟دى جريمة ..ألا تعلم ياغبى أن اللغة العربية هى لغة أبوك آدم فى الجنة،ولغته لما هبط منها..وسنبعث لنتكلم مع الرب بها؟؟؟يابهايم ياحمير؟؟طبعآ الكلام ده كلام خوجة العربى وكان شيخآ معممآ؟؟
يبدو أنهم كلهم على بعضهم على نفس الشاكلة..فالسيد أجروب ولو ماكنتش فاكر هوه مين..أقولك هو صاحب غزوة الصناديق فى مارس سنة 2011..وقد صرح سيادته..بأن النتيجة هيه اللى قالت..إللى قال نعم دخل الجنة..واللى ماقالش ومش عاجبه..وأشار بيده الكريمة اللى زى الزبدة من قلة الشغل والقعدة المريحة..يفتى بما يعرف ويزيد مما لايعرف وأهو كله أكل عيش..لأ ياربى أكل بقلاوة ومهلبية..وأوعى تجيب سيرة الفول..على لسانك..فالسيد أجروب لايتعامل مع أبوقدرة..ولا يقترب من بتاع البليلة فهى أشياء لايتناولها سوى السوقة..يعنى بتوع الحوارى..أو الموظفين .ا
فى جريدة الوطن يظهر لنا الرجل كباحث إجتماعى يتحدث عن المشكلة وأسبابها ويطرح العلاج الناجع...طيب ياعم أجروب ماكان من ألأول..يعنى إحنا إللى قلنالكوا إشتغلوا بالسياسة؟؟ياعم أجروب السياسة زى الفلاحة يعنى علم أباحة..أو كزراعة اللفت فى أرض الزفت وقد كانت النتيجة زى ماشفتوا..خيبة قوية بعد أن كان هناك تصريحات عنترية..تقول منك لافض فوك.. واللى مش عاجبه ويشير بيديه ناحية الشباك..مامعناه الباب يفوت جمل..وصدقنى لاأعرف أهو جمل بسنام واحد أم هو مثلهم بوشين..قصدى بسنامين؟؟
علينا أن نبتعد عن السياسة وأن نحط دماغنا فيما قاله السلف الصالح..سيدى ياسيدى..وعلشان خاطرى قولها تانى....ا
هذه علامات النهاية يعنى يوم القيامة بالنسبة لهم..أمثال المدعو صفوط ..والمدعو بدعدع..والمأسوف على شبابه..إللى مش متغطى..طبعآ هم أشهر من نار على قطعة تدعى ولا مؤاخذه......!!ا
معلهش ولسة بعد المشوار الطويل ده فى قناة قطر أول أمس وجدت رجلآ معممآ..من بره الله الله..ومن جوه يعلم الله..ياترى قال إيه؟؟
اتكلم ياكمبورة بالنيابه عنى..لأنى مكسوف..,ل أقولك خليها بكره وزى مابيقولوا الصباح..رباح
No comments:
Post a Comment