نار ياخواتى نار..حد يطفيها دى مولعة يااخوانا

 
شاهدت فى قناة سى.إن.إن أن هناك حريق قد حدث فى عزبة أبوحشيش...إنتهى الخبر..وللعلم فهذه القناة تنفرد بالأخبار الهامة على مستوى العالم ،وقد حاولت أن أتحرى صدق الخبر فتأكدت وقيل لى أن واحد من خلق الله قام من المحمول الذى معه بالإتصال بالمطافى وهو إجراء طبيعى يحدث حين اشتعال حريق  :ا

أيوة..آلووو مين معايا؟؟*

ألووو إحنا سكان عزبة أبوحشيش فيه حريق قامت عندنا فى العزبة وعاوزين حد *

ييجى يطفيها

إنت بتتكلم من المحمول ياسيد نمرتك قدامى مظبوط؟*

؟؟؟أيوة تحب تاخد رقمى ولارقمى القومى وعنوانى؟؟*

لأ ياسيد إحنا ممنوع نتلقى بلاغات من غير التليفون ألأرضى..دى التعليمات إللى*

عند القوة من الإدارة  ومانقدرش نخالف التعليمات

بقولك فيه حريقة*

........................*

الظاهر التليفون اتقفل؟؟طب وبعدين*

يكرر المحاولة مرة أخرى لعل وعسى ويطلب المطافى

ألووو ألوووووووووو*

أيوة يافندم مين معايا؟؟*

الصوت مختلف عن الصوت ألذى أجاب فى المرة ألأولى..يامسهل

يافندم فيه حريقة فى عزبة أبو حشيش وعاوزين المطافى يلحقنا بسرعة إعمل *

معروف ربنا يعمر بيتك...ألأخ إللى رد عليه قبل سيادتك قاللى مابناخدش بلاغات عن طريق المحمول...

لا ماتاخدش فى بالك ده لسه متعين جديد وأصله كسلان شوية،مااطلعش على *

التعليمات الجديدة..أصلها وصلتنا من خمس سنين بس يادوب لسه طازة..إحنا آسفين يافندم

معلهش ممكن آخد بيانات من سيادتك يافندم*

أوى أوى أنا تحت أمرك*

ويطلب من المبلغ معلومات عنه وعن بطاقته القومية وإسمه،وإسم النبى حارسها أمه،وأبوه،واللى جابوه ،وآخر مرة راح فيها لطبيب أمراض نفسية وعصبية...ليقاطعه المبلغ مستفسرآ:ا

يافندم إسمى وعرفنا ه طيب إسم أمى وإسم أبويا ليه.........؟*

دى أوامر عليا ياسيد ماتتكلمش كتير ودى تعليمات بنفذها*

معلهش آخر سؤال هوه عنوان الحريقة عزبة أبو حشيش  ؟*

أيوة يافندم*

وعزبة أبو حشيش دى على خريطة مصر المحروسة؟؟*

أيوة يافندم فى غمرة*

آسف والله ماعندناش تعليمات بإطفاء أى حريقة فى أى مكان فى مصر المحروسة *

إحنا نسيبها لربنا هوه قادر يطفيها بمعرفته..إحنا ننتقل للحرايق إللى بتقع فى البلاد المجاورة ،أو البلاد الصديقة مثل موزمبيق،أو بوركينافاسو،أو بلاد تركب ألأفيال

ياسيد مصر إسمها مصر المحروسة لاتتأثر بماء بارد أو نار ملهلبة ربنا حارسها من كل شر،سيبها لله هوه هيطفيها وهتبقى آخر حلاوة ..ده حتى ياأخى الجو برد والحريقة دى رزق من عند ربنا علشان الناس تتدفى ،إنتو مابتتعلموش من الحرايق إللى قامت قبل كدة فى المجمع العلمى مثلآ،لما ولعوا فيه والناس بينها وبين المطافى فركة كعب يقولوا إلحقونا فيه حريقة قدامكوا..قلنالهم النار ماتحرقش مؤمن..ماتخافوش وخلوا إيمانكوا قوى بربنا..إنتوا عاملين كده ليه؟؟؟ياعم خليها على الله وروح خلوا حد من أصحاب المقشات يقرا عليها أو يقول الله أكبر الله أكبر سبع مرات وهيه هتنطفى بإذن الله

وهكذا وفى اعتقادى وكما أرى ومن وجهة نظرى أن حريقة أبوحشيش،ستكون مثل حريقة المجمع العلمى،مثل حريقة مصر المحروسة التى لم يقترب منها أحد حتى ألآن ليطفئ لهيبها أو ليخمد أوارها...ا

باحبك يامصر والله باحبك وباتكلم من غلبى ومش لاقى حد أشكيله همى وأحكيله على نكدى إلا أنتى ياأم البلاد ياحاضنة الولاد  ياحبيبتى يامصـــــــــــــــــــــر