يابناة ألأهرام لكوا الجنة ولنا الصبر والسلوان

أكتب دائمآ وعلى يمينى فنجان قهوة مستكوفى وعلى شمالى شريكتى فى السكن تقوم بعزف سيمفونية تقول بيتهوفن ولاموزارت فى عز شبابه مما جعلنى أدعو ربى أن يلهم العلماء بابتداع دواء مضاد للعزف أثناء النوم،أو تخفيض التون قليلآ لأن ذلك سيجعلنى فى موود يتماشى مع ماأود أن أقوم به.ا

منذ قليل كنت أعبث بالريموت كنترول وكان من حظى ألأسود أن اقتحمتنى قناة فضائية مصرية بعيد عن السامعين..وربنا ماحد يشوفها ولايحكم عليه طبعآ كلام دش منه فيه..الموضوع سخيف والمتحدث أسخف مما جعلنى أجزم أن الذى أشاهده هو صادر عن جمعية خيرية للمعوقين من باب جبر الخواطر ليس إلا لكن المهم هو مشاهدتى لإعلان على الشريط السفلى محتواه أن النظافة من ألإيمان وعلينا البدء بهمة ونشاط كى تبدو بلدنا نظيفة..إلى هنا والكلام حلو وجميل ومفيش أحسن من كدة..أما مايلى فهو أنه فى حالة الشكوى نتصل بتليفون رقم كذا للإبلاغ أو الإعلام؟؟

بذمتك عمرك اتصلت بتليفون للشكاوى وحد عبرك ولا سأل فيك ؟؟طيب إدينى عقلك ولامؤاخذة إمشى ....أهرامات الزبالة إللى فى الشوارع دى تستحق تليفون؟؟دى تستحق عشماوى أو واحد مثل خالد الذكر صدام حسين الله يرحمه ماكانش عنده تفاهم..شنق على طول للى يلعب بديله ولا يقصر فى حق الشعب..أما عندنا ففلوس النظافة بيشتروا بيها عربيات لونها اسود آخر موديل لزوم فخفخة البيه رئيس الجهاز ومفيش مانع زوجة رئيس الجهاز وفوق البيعة أولاد رئيس جهاز النظافة...همه يعنى مالهومش نفس؟؟ده حتى تبقى قلة أدب لو ماركبوش حتة عربية على حساب الدولة ومن الفلوس اللى بيجمعها بابا ..بالذمة ده كلام؟

طيب سلفنى جمجمتك  لمدة ثوانى لو سمحت علشان أكتشف سر بناء أهرامات الزبالة دى؟؟طيب إحنا عرفنا إزاى أجدادنا الفراعنة بنوا أهرامات الجيزة وعرفنا سر التحنيط والتظبيط والذى منه لكن بينى وبينك هيظل سر أهرامات الزبالة سر من ألأسرار الحربية التى لن يكشف عنها اللثام إلا على يد خبير أجنبى همام ويمكن ياخد على اكتشافه ده جايزة نوبل ؟؟

واحد صاحبى بيقوللى فى بولندا كل واحد يصحى من النوم يزيح الجليد إللى أمام بيته

وبعيد عنك عربيات النظافة بتقش ألأكوام ولامن شاف ولا من درى..يعنى سكيتى كدة ولا توجد عربية سودة للبيه رئيس الكناسين ولاحاجة..معقول ده ياناس؟؟

يعنى معقول مافى أهرامات  فى بلاد بره..الناس دى مخاوية الجن أو بتحضر عفاريت وخلى بالك علشان كده هيدخلوا النار حدف أما نحن بناة ألأهرام ألأولى وبالمرة الأهرام التانية فعلى الجنة حدف ..تعرف ليه لأننا اتعذبنا تانى وتالت وتلات اربع وكل ده علشان فينا واحد بينجعص فى عربية آخر موديل واحنا بننضرب بقنابل فاتت مدة صلاحيتها..ا