ياناس اتقوا ربنا وماتقولوش سمك لبن طمر(تمر) هندى

كل شئ فى ها البلد أصبح بالهوى والمزاج..لما اتنين يختلفا فى خبر،أو تقرير،أو سرد لنبأ ممكن نقول ممكن ونبلعها..واحد يقول السماء لم تمطر اليوم،التانى يقول لأ دى أمطرت فوق رؤسنا وكنا بنتكتك من البرد..ده لأنه فى بلد تانية وده غير دكها،وده صح وده صح برضه..معايا ياترى ولا نمت منى؟؟

إنما يامبارك لما واحد يطل علينا بطلعته البهية ويكذب الخبر الذى مازال عالقآ بالأذهان ولم يمر عليه يومان ليخبرنا بأن عروسة البحر وجدت ملقاة على الشاطئ،وأنه لايوجد عروسة البحر فكأنه يدعى العلم ويحاول أن يحشر نفسه بالقوة وبالعافيه فى زمرة العلماء!!

كدة بسهولة ياعم الشيخ؟؟ياللى فضحت نفسك وأبنت جهلك على الملأ،واللى يتفرج أهلآ وسهلآ وعلى عينك ياتاجر؟؟

نفسى ياأبو العريف تذهب إلى متحف ألأحياء المائية فى مدينة الغردقه لترى عريس البحر وشرفك العبد لله شافه وماصلاش على النبى وأقولك أمارة يابو العريف وماتقولش لحد...والله حسست على جسمه ولمست كل نقطة فيه حتى اللى بالى بالك حتى أتأكد وليس لغرض خبيث أنه عريس البحر 

عليك أن تذهب للمجمع العلمى إذا كان مازال فيه رمق من حياة ولم يكن ألأخوان قد نهبوه فى غفلة من الزمان وظنوا أن الحفريات التى به هى طوب أو حجارة يظن الكفرة والعلمانيين أنها تماثيل مسخوطة يستعملونها بدل التماثيل التى كان يعبدها أجدادهم بالجزيرة العربية!!ا

ياناس حرام عليكوا تأكدوا قبل أن تتفوهوا بما ليس لكم عليه من سلطان،من الممكن أن تتصل ياأبو العريف بكلية العلوم بجامعة القاهرة لتتأكد أن الدكتور الذى اكتشف حفرية عروسة البحر بالفيوم قد سجل له التاريخ ذلك واسأل أيآ من علماء الباليانتولوجى مدى صحة هذا الكلام

باى باى أبو العريف وليلتك غير سعيدة ويارب بعد ماتموت يجى ألأولاد بعد مليون سنة ويجدوك حفرية مالهاش لازمة ولا عازة....قول يارب