تعرف ..أنا زعلان!!

ماتتفلق ياأخى أنا فاضيلك علشان تقوللى أنا زعلان؟؟أأقولك حاجة أنا مش زعلان والله العظيم أنا قرفان

وبعد برهة يستدرك ننوس عينه ليقول لى جملة إخبارية جديدة تحمل بين براثنها تقريرآ مملوء بالصدق على عكس ما كان صديقى متعودآ عليه من كذب وكلام مايصفاش على النص:بينى وبينك أنا مش زعلان لأنى شايف ان كل الناس زعلانة زيى وهذا يعنى أن العدل فى الظلم مساواة فجارى العزيز عبد العزيز عنده فى عين العدو تلاتة من الجيل الصاعد واحد فى أولى ثانوى،التانية فى تانية إعدادى،التالتة فى رابعة إبتدائى..ومش عارف يصرف عليهم.والست قالت كفاية كدة،وكدة رضا رغم أنها تجزم بأن وابور الطحين نازل طحن كل ليلة ولو سابت الشباك مفتوح على البحرى ومفيش مانع ومالو ياخويا أدخل براحتك،ومن سبعة لسبعة ياقلبى لاتحزن..لولا إن فيه ذرة عقل لسة موجودة كانت التلاتة أصبحوا داخلين فى متوالية الله أعلم ياترى متوالية عددية،أم متوالية هندسية؟؟

ودى أسرة مثال لما يعج به المجتمع المصرى من تواكل ويظن أن الرب هو الرزاق ولاتقتلوا أولادكم خشية إملاق،واعقلها وتوكل..وماتخليش الشعوب التانية تقول علينا خسعنا أو جالنا داء الحلل وماعاد عندنا قدرة على الخلفة وأن معدل الخصوبة الذى كان ترتيبنا فيه ألأول...سامعنى ألأول على العالم سوف ينزل كما نزل مستوى الفريق المعروف باسم فريق 6/1؟؟؟

المرض ...آه باسمية مرض..ماهو الفقر مرض..والجهل مرض،وإسم الله عليه بعيد عن السامعين المرض برضه مرض..لكن تقول لمين لازم نكون ألأول على العالم حاجة واختار انت وانت وشطارتك ورشحلنا واحد من التلاتة نكون فيه ألأول بلا منازع على العالم...

فكرت ده مين ده اللى هوه أنا لما لقيت البنات إللى فى كلية من إحدى الكليات اللى بيقولوا عليها كليات عاملين فى نفسهم البدع(جمع بدعة) وعرفت ان الجهل سيد الموقف بدل ما تلم نفسها وتذاكر لها حاجة لأ إزاي لازم تتأنتك على الآخر وياريت تصحصح ويايا وتكون ويايا على الخط ..وانت وحظك ياتكون على خط مصر إسكندرية،أو على خط الصعيد،أو يمكن تكون على خط المناشى،وعلى فكرة التلاته واحد ..الخدمة فيهم متشابهة..آخر منجهه،والنظافة عشرة على عشرة،ودرجة تالتة أصبحت تنافسها درجة أولى فى القذارة وممكن لما يكون معاك مزة تاخد راحتك فى ركن هادى خاصة لما تكون بالليل لسبب بسيط أن القطار لاتوجد به إضاءة ولا دياولو..الناس عايزة تشوف شغلها وانت عامل فيها أبوعلى وعاوز الحكومة تعكنن على الناس والرومانسية تغور فى ستين داهية؟؟ده انت شر 

معناة الكلام ان مصر المحروسة حالها أصبح لايسر عدو ولا حبيب..

ليه يامولانا ده ألأمور ماشية تمام إيه إللى مزعلك تانى؟؟

ينجعص صديقى ويتنحنح مرة ويلوى لسانه فى فمه مرة أخرى وكأنها مارش عسكرى لازم قبل إلقاء السيد محمد مرسى إللى كان مفكر نفسه رئيس بجد وإيه؟؟لكل المصريين...مصريين فى ركبك يا مرسى..مش كان بيقول كده

كنت فى مشوار للقاهرة اللى كانت ساحرة زماااااان..ودخلت الكافيه المحبب لنفسى وهو ألأمريكيين فى ناصية سليمان باشا..طيب وبعدين؟؟

وأنا قاعد باكل سلطانية الجيلاتى اللى بيقولوا عليها كيشووا...وباتفرج على خلق الله من وراء القضبان..قصدى من وراء الزجاج على خلق الله زى ماقلتلك..وإذا بأحد الصبيان الغير محترمين ..تسألنى ليه؟؟أقولك لابس حاجة شكلها لاهوه جلابية،ولا هوة بجمة(بيجامة)؟؟ولا تى شيرت،ولابس زعبوط حتى أنى فكرت أنه أحد فريق العمل ببرنامج البرنامج المأسوف على شبابه هوه وصاحبه...ماعلينا وبعدين؟؟

وإذا بهذا الفسل الذى اجتهدت أن أحل طلاسم هويته ففشلت يحضر فرن منزلى يعمل بالبوتاجاز زائد طبعآ أنبوبة بوتاجاز طبعآ شيئ طبيعى لأن فرن من غير أنبوبة مايبقاش فرن،زى ملوخية من غير تقلية ماتبقاش ملوخية،تمام؟؟

وبعدين؟؟ خلصنى خلصت روحك..قول آمين؟؟؟

بعد كدة إذا بأحد المساعدين يأتى بجوال يعنى (شوال) مليان كيزان درة أخضر؟؟وابتدا المشوار باشعال الفرن وشوى الدرة...فين ياعم الشيخ؟؟

والله العظيم والرب والمسيح الحى أنا شفت النظر ده أمام بياع الجرائد أمام ألأمريكيين فى وسط شارع فؤاد والفرن طالع لهاليب نار منه والولد مستمتع بانه هيكسب قول عشرين جنيه مثلآ..لكن مصر خسرت ياكلب يابن ..أللى مش بنى آدم بتشويهك لمكان كان محترم فى يوم من ألأيام ثم جار عليه الزمن وأصبح مكان لشوى الدرة؟؟

الجهل والفقر والمرض..أصدقاء الشعب المصرى زى زمان ماكانوا يقولوا:

أصدقاء الفلاح..ألهدهد،والعصفور والغراب..وأبو قردان

فهمت حاجة منى يابو قردان؟؟؟باى باى حنكورة وابقى تعالى أنا هناك بس ماتغيبش عليه