نفسك فى إيه ياعم جورج؟؟
نفسى تبعد عنى وعن طريقى..ياعم سيبنى فى حالى أنا ناقصك!!
طيب بس روق..تاخد سيجارة؟؟
ماباشربوش ماباتعاطاهوش مابحبش ريحته ياعم الله لايسيأك إبعد عنى..تصدق بايه؟؟أنا نفسى مو طايق نفسى
يعنى وصلت لدرجة أنى كرهت نفسى وهى إحدى درجات التآكل النفسى التى قد تنبئ عن إنهيار للمجموع العصبى المتقوقع فى بؤرة الفرد الداخلية التى قد تبهت على النظام الكلى للفرد مما ينعكس أثره على النوع ألإنسانى والجنس البشرى
لأ بأه ياعم جورج أنا لافاهم ولا عايز أفهم..إنت بتقول شعر فى هيئة نثر؟؟بتقول حكم والا بتقول مواويل؟؟
لأ ياحبيبى الكلام اللى قلته هو أصدق تعبير عما يدور فى نفس مواطن مبقوق..ومبقوق يعنى مسبهل من كتر اللى شايفه ..وطبعآ لاأنت عارف مبقوق،ولا عارف مسبهل وكأنى قد فسرت الجهد بعد الجهد بالماء..الماء الذى بعد 30سنة بالكتير لن تجدها لترش بها الشارع علشان تجيب طراوة،الماء الذى بعد وقت ليس بالبعيد سوف تشتريه بالكوب،وساعتها أرجوك تيجى وتقوللى وأنا نايم مستريح من الدنيا وبلاويها فى قبرى الذى أتمنى أن أحصل عليه وهو متر ونصف فى متر لاأكثر ولاأقل لتقول لى أخبار الدنيا عندكم إيه؟؟بعد الشر حلوة؟؟ماأظنش دى لو إستمر الحال على هذا المنوال هتكون خرابة وكل واحد يقتل التانى علشان يلحق متر فى متر يقدر يعيش فيه،ولما يموت هيقتلوا بعض عليه!!ا
كل ده وكاتمه فى قلبك ياعم جورج..ياراجل الحياة أهون من كدة..تصدق بالله أنا امبارح فرحت واسبهليت لما عرفت إن حمدين صباحى مانت عارفه ،اللى قال بعد إنتخابات الخرفان إللى فاتت"أنا رئيس مصر القادم""..قد شمر عن ساعديه وطرد الشياطين من حواليه..إسم الله عليه وأقام سرادقآ إنتخابيآ باعتبار ما سوف يحدث من إقامة إنتخابات قادمة لرئيس الجمهورية
ياخيبتك فرحت واسبهليت؟؟على إيه؟؟وهوه المدعو حمدين صباحى كان فين من زمان؟؟هل كان بعافيه حبتين؟؟هل كان فى فرقة شمس فوق السطوح بيقتل القمل الذى يطيح براس سيادته؟؟
والله معاك حق ياعم جورج..الناس دى واللى كانوا مصدعين رءوسنا بما كان يسمى جبهة ألإنقاذ لاسمعنا لهم صوت بل سمعنا من صوت عليهم ولكن لم يقل:ا
ياجملى..ياسبعى..ياللى كنت مالى البيت عليه ياخويا..إلى آخر تلك الترنيمات العبثية التى تسمعنا إياها المعددتية أو الندابات..وهى مهنة لبعض النساء كانت تمتهنها مرة (واحدة ست)لاتجد لها شغلة أو مشغلة سوى أن تلهب صدور النساء على عزيز مات لهم
وهل تجد لهم فائدة اليوم ياعم جورج؟؟
الواقع ياإبنى أن اليوم هو اللحظة المناسبة لاستعادة الندابات حيث المناخ ملائم لنندب حظنا ونندب موتانا الذين توهمنا فيهم يومآ أنهم المخلص لأوجاع مصر،والذى سيحمل على كاهله بلاوى مصر وما تراكم من العقد والشراشيب فيكى يامصر..إمبارح بكيت وندبت عليكى يامصر لما شفت الواد اللى ماأعرف لونه ولا طعمه لكنى بالتأكيد أعرف رائحته..فهو الواد النتن الذى حرق رمز مصــــــــــــــــــــــر؟؟
طيب ياعم جورج انت هتقعد تولول زى بتوع الله يرحمهم بتوع جبهة ألأنقاذ دول ماتقول حاجة..ماتقترح شئ؟؟طيب وحياة أبوك ياشيخ قول لنا وسمعنا صلاة النبى
آآآآآآآه ماهم بيقولوا صلاة النبى أحسن من كل شئ؟؟شفت خيبة مخ وعقل وتفكير الشعب المأفون..ومش هاتكلم أكتر من كدة أحسن بتوع أمن الدولة يعملولى قضية إزدراء أديان..ياعم خلينى ماشى فوق التروتوار
وقد كان نفسى فى قدح من القهوة المستكوفى التى قال عنها الراحل عبد المنعم مدبولى فى مسرحية "ريا وسكينة" لأنى تعبت خلاص من كتر الشيل والحط
تعرف ياد إنك مسكت مربط الفرس،وإنى لازم ولابد بل يجب على أن أدلى بجردلى فى المسألة المصرية أو المشكلة الوطنية وأن أخرج مافى جعبتى من اقتراحات يارب لا توضع فى سلة المهملات!!ا
لم يرد على بالى فى تلك اللحظة إلا صورة وزارة المعارف العمومية وقد رأيت الوزير الهمام فى التلفاز يقول بالفم المليان""أنا سبت -آخد بالك من سبت دى-بيقولها وزير التعليم الذى من المفروض أن يكون قدوة أو حدوة للناس فى الحديث بلغة عربية..ماهى عربية مهكعة يعنى جت على دى ياسى جورج؟؟
نكمل ماقاله الوزير يقول لافض فوه"أنا سبت رسائل الدكتوراة -باعتباره مشرفآ على تلاميذ الدكتوراة- والآن أطلع على كتب أولى وتانية إلى سادسة إبتدائى لأصحح ماقد ورد فيها من أخونة(أخولة) عفوآ القافيه حكمت معلهش وتصحيح ألأخطاء بها؟؟
ياسنة سوخة ياولاد..الوزير بنفسه يقرا ويحاول أن يصحح؟؟
لازم أرجع وياك لسنة 1950 ساعتها كان فيه وزير إسمه طاها حسين كان ساعتها لابس الطربوش وعضوآ فى حزب الوفد على ماأتذكر وقد اختاره رفعة رئيس الوزراء مصطفى النحاس باشا زعيم حزب الوفد وصاحب المقام الرفيع..ليكون وزير معارف...فقبل بشرط أن تتقبل الحكومة أن يكون التعليم كالماء والهواء وأن يكون بالمجان لكل طبقات الشعب؟؟
ممكن ارتاح شوية ونتقابل بكرة ..وماتنساش تسلملى على كمبورة وقوله فلوس الجمعية جاهزة وخليه يعدى عليه
الله يخرب بيتك لبيته
No comments:
Post a Comment