هوه فيه كوسة فى مملكة الحمير؟؟

 قلت للباشحمار : إمتى هاستلم كرنيه العضوية فى مملكة الحمير،ممكن سيادتك تدينى كارت توصى فيه على أخوك الحمار لأحصل عليه بسرعة علشان أكون رسمى حمار وابعد عن مملكة البنى آدمين الجايفة دى؟؟؟؟

وضع طرفيه ألأمامين وراء رقبته وطأطأها مرة ..ويبدو أنها لم تأتى بالنتيجة التى كان يبغيها إذ أنه يبدو أن رقبة سيادته بها آلام روماتيزمية وذلك راجع للجو المهبب الذى نعانى منه هذه ألأيام..فحاول مرة أخرى فسمعت صوت فرقعة شديد بعدها ابتسم وكان لسان حاله يقول أيوة كده أنا ارتحت وسبحان صاحب الراحة؟؟

انجعص سيادته أكتر وقال لى:إسمع يابنى إنت لسه حمار صغير وخبرتك فى عالم الحمير على قدها ومش قد كدة..إنت مفكر إن عندنا كارت توصية،لوظيفة أو لدخول نادى،أو حتى لدخول الحمام زى عندكوا؟؟ياحمار إحنا نعيش فى مجتمع حميرى ينعم بتكافؤ الفرص وعلى قد خبرتك بتاخد حصتك،ومفيش ابن اللواء يبقى لوا،وابن العسكرى يكون حرامى علشان مش لاقى ياكل ولا يشرب..لأ ياروح  الروح كله حسب كفاءته وخبرته أما أنتم فنسمع عنكم العجب العجاب..من رشوة وتحت الترابيزة وأشياء أخرى يدخل فيها الجنس الذى تسمونه الجنس الناعم كعربون محبة أو فتح نفس للحصول على عطاءات،أو ترسية مناقصة ..أو علشان تبقى وزير أو حتى تكون زير مابتفرقش ،وهكذا تهدر الكفاءات وتداس الناس بالمركوب وتهش بالمذبات!!ا

عندنا كل حمار لازم ياخد حقة ولا وجود لمرشد حمار كعندكم يفرض سلطانة وسلطاته على خلق الله حتى أكبر راس أنتخبت وجاءت عن طريق الصناديق..بينى وبينك لم أستطع أن أكتم ضحكة انحشرت فى زورى وفمى لأنى أنا وانت عارفين البير وغطاه..وعارفين أن الجماعة اللقيطة والتى حتى اليوم بدون هوية شرعية قد قالت :والله لو ماجه عبد اللاوى للحكم هنخليها مجزرة ونقلبها ضلمة..علشان كدة ضحكت من خيبتنا وقلة حيلتنا.ا

يستطرد الباشحمار وهو منجعص وطارحآ أطرافه ألأمامية وراء ظهره :عمرى ماشفت بلد زى بلدكوا..أنا اتركبت واستحمرونى فى بلاد كتير يعنى تقدر تقول عليه حمار دولى لفيت العالم كعب داير زى مابتقولوا وساعات كنت انتدب فى بلاد متعددة للقيام باعمال حمورية لايستطيع حمير البلد ان يقوموا بهاعمرى ماشفت الهجايص الموجودة فى بنى البشر فى مصر المحروسة...رشوة..ضمائر هربانة،أيادى مرتعشة،كروش تاكل مال النبى ولا يهمها..ناس بتتخانق ويا بعضها على كرسى الحكم..ونسوا أن مصر لاتختزل فى كرسى ..ا

تضاءل حجمى جدآ وأنا أتلقى محاضرة الباشحمار الموجعة..التى تجعل أجدع الناس ىتنهار ؟؟

ولم أستطع أن أنبس ببنت شفة وكل ماتمتمت به للباشحمار   وأنا أتوسل إليه:ا

إحياة أبوك إللى كان حاصل على تسجيل إسمه فى موسوعة جينيس الحميرية نظرآ لما قام به من جهود خارقة نحو المجتمع الحميرى  ..تكتبلى على كارت من كروت حضرتك توصية لمدير مصنع العلف والتبن الإستثمارى بالعاشر أن يقبلنى كحمار  صغير تحت التمرين فى المصنع،ومستعد لكل ألأوامر إنشا الله يركبونى طول الليل والنهار..أنا راضى..ا

أنا راضى وانت راضى..وذنب الناس دى إيه ياقاضى؟؟

نحن حمير انسلخنا من الجماعة الحزينة  ونرجو من الرب أن يصلح ألأمور ويزيح الطرطور والحمد لله رب الحمير والعالمين فهو رب ألأرباب وخالق ألأكوان وبيده كل شئ..حتى سخط الناس لخنازير..وقرود وابقى قابلنى يامحمووووووود