وبالرغم من أن سيادته وأنا -لاحظ أنى أقدمه على شخصى فالمقامات محفوظة طبعآوالأدب فضلوه على العلم-ننتمى لمملكة واحدة وأصلنا واحد فقد استأثر سيادته بأشياء وأصبح يفضلنى بل سبقنى وتفوق على؟؟
هيه إيه الحكاية؟؟ماتقول وتخلصنا،ولا انت دايمآ تمط وتطول وتجيب من هنا وتودى هناك؟؟
بينى وبينك كلامه وجعنى وهذا يرجع إلى أنى أمتلك شوية إحساس ،ولا أعد ممن يستمعون الكلام فيجيبون بعد أيام فهذا طبعهم والطبع يغلب التطبع والدليل على ذلك الراجل ياولداه إللى بايده يأمر وينهى الناس إتقلت قصاد عينه أو عينى عينك ولم يتحرك قيد أنمله -عفوآ ياعم الحاج محمد لطشتها منك يوم ماقلت لن أتراجع قيد أنملة-تتراجع ولا ماتتراجعش النتيجة واحدة..الدنيا خربت والشعب كله أصبح بياخد المدعوق اللى إسمة ترامادول وحضرتك انت والبطانة المقدسة تقولون ذلك جهارآ نهارآ بأن المعارضة والبلطجية قاموا بهوجة ضد الشرعية؟؟
ماهو لازم ياعم الحاج يحصل اللى بيحصل ده..لأن الدنيا هايصة والناس لايصة وألأهل والعشيرة عاملين ودن من طين وودن من عجين؟؟ماعلينا ونرجع للأخ الرفيق الرقيق الذى جار على العبد لله وحصل على مزايا عينية أكثر بكثير منى..طيب ليه...وفى شرع مين؟؟
كل صباح أرى علو برسيم يوضع أمامه وبسم الله ماشاء الله ينقض عليه ويهز أذنيه طربآ وفرحآ ولسان حاله يقول...كمان...يالهوى إيه ياأخينا ده علو برسيم بالشئ الفلانى بينما أنا مقبل على توزيع رغيف العيش المسخوط بالبطاقة ألإلكترونية التى تسمح بثلاثة أرغفة وليس ثلاثة ونصف لأتسمم بها طول النهار ،وسيادته يمضغ قدح فول وأنا أتوارى خجلآ حين أدفع بالتى هى أحسن واحد جنيه لأشترى به فووول مدمس ،وقد صدر من بائع الفول فرمان كتلك الفرمانات الجمهورية مع فارق بسيط هو أن الفرمانات الجمهورية تتغير وتتبدل أو قل تلغى بعد صدورها بساعة أو أقل لتنعدم أو تبل وتشرب ميتها؟؟ياحلاوة ياولاد عشنا وشفنا أكبر راس ترجع فى كلمتها ..ده حتى مدير إدارة عجران فى شركة هشك بشك مابيرجعش فى أمر ادارى يصدره ؟؟هوه جرى إيه فى الدنيا لم يعد فول بجنيه ياسيد فيه بجنيه ونص تاخد ولا...؟؟؟
وآخر فرمان الناس قالوا خليك مرتاح إحنا اللى هنلغيه وحصل فعلآ بعد أن صدر الفرمان السامى بحظر التجوال مع فارق بسيط هو استبدال حظر التجوال بلعب الكورة الشراب وذلك من خلال فريق ألأسد المرعب أمام فريق التور أبو مخ تخين وإقامة حفلات الرقص ومناسبات الزفاف...ورقصنى ياجدع على واحده وهس..قصدى واحدة ونص.ا
أخى اللى باتكلم عليه إللى أنا مفروس منه بيبصلى بطرف عينه وبيضحك على العبد لله ولسان حاله يقول:أنا أجدع منك ومن صاحبك اللى بيرجع فى كلامه،أنا لما أحلف بالطلاق على الحمارة مراتى ماارجعش فى كلمتى|..الحمار حمار ياصاحبى!!
أضطر لأن أدلدل ودانى وأسد بقى بحزمة برسيم ولا أقول شيئآ فقد غلبنى الحمار وجعلنى أحمر منه لأنى أعامل أقل منه وثمنى عند الحكومة برنز وياريتك تعرف إيه هوه البرنز وياريتك ماتغلطشى وتقولى آآآه البرنز هوه حسن البرنز..لأ ياناصح البرنز له قيمة وسعر ومهر أكبر وأكتر من حسن البرنز ..ياعم فوووق ده انتو عالم فعلآ بتاخدوا ترامادول..جتكوا البلاوى..آل تلات ارغفه آل...وسلملى على عم الحاج
No comments:
Post a Comment