المحمدون يغزون السيبر علاجآ للكبت الجنسى

هو إبن جارى ألأستاذ إبراهيم..غلام فى السابعة عشرة..يعنى على وش ثانوية عامة..طيب وبعدين..لاسمح الله حصلتله حادثة؟ راح إسكندرية ونزل البحر المالح ومااتبلش؟؟لألألأ يعنى لأبالتلاتة..زى أبوشنب مايفرقع صوابع رجليه ويحلف على مراته بالطلاق تلاتة!!ا

الحكاية أنى لاحظت أن إبن جارنا هذا لازق فى الشارع تقريبآ 20ساعة..وهذا للصدق والبعد عن الكذب..مع شلة تطلق على نفسها شياطين الكرة الشراب رغم أن الكرة الشراب دى كانت على أيامنا صاحبة جائزة نوبل للرياضة بين الشباب المصرى ،إذ أن الكرة الكفر كان ثمنها حراق  يعنى قول من 2جنيه لثلاثة من الجنيهات المصرية التى كان أبوالهول يترسم عليها ولسان حاله يقول:ياأرض إنشدى ماعليكى قدى..والحقيقة كلامه كلام ملوك لأن بالجنيه ده كان الشحط فينا وهوه على وش جواز يعيش 5 أيام بهذا الجنيه،فقد كان لديه عزة نفس وكرامة لايضارعة فى شدتها وقوتها الجنيه ألأنجليزى ولامؤاخذه المسمى بالأسترلينى ..أو المسخوط فى ذلك الوقت الذى كان يتوارى خجلآ من الجنيه المصرى والمسمى بالدورر؟؟

الجنيه كان أسد ممكن تشترى 5 ريالات سعودية بجنيه؟؟ياحلاوة ياولاد!!أ

أما المسخوط الذى قلت لك عليه فقد كان سعره وياريت ماتقولش لأحد...30قرش..صدقنى لاضارب نفسين حشيش،ولا شارب بنورة منكر،ولامبلبع سكلان أو صراصير..والله ده كان يعنى حصل

صاحبنا إبن مسعود جارنا على رأى ألمرحوم مدبولى فى لو كان دة الفردوس حاولت أن أقترب منه وأدردش وياه وحدث معه اللقاء والحديث الصحفى التالى:ا

إنت يامحمد على ماأعلم فى سنة ثالثة ثانوى؟

آآآه

طيب لو حبيت أعرف ...إنت بتقضى وقت فراغك إزاى؟؟؟

يعنى ماأنت شايفنى ..طول النهار فى الشارع بنلعب كورة شراب

طيب يامحمد ماحاولتش تقسم وقتك وتلعب كمبيوتر مثلآ أو ...تروح مكتبة من المكتبات العامة مثلآ؟؟

ينظر محمد للعبد لله بنظرة كأنى هابط من السماء ..رجل فضاء..سواق طبق طائر؟؟  ويقول وهو يستعد للمشى من أمامى ويبدو أنه إتخنق من حديث الراجل العجوز ده..وقال:ا

مكتبات إيه ياعم؟؟لسه عاوزنى أقرا ؟؟ماكفاية فى المدرسة طالع عنينا فى كلام لايودى ولايجيب..بيقولك الذرة متركبة من .....ويصمت ثم يصمت..ثم يتذكر..من الكترون وحاجة تانية مش فاكرها دلوقت !!أ

يعنى وقتك كله يامحمد للكورة؟؟طيب بينى وبينك كده مابتروحش السيبر وتدخل على مواقع ثقافية؟؟

يبتسم أولآ..ويبدو أن الكلام قد صادف هوى فى نفسه..أو أنى دخلت سكة بيحبها

آآه ياعمه بس علشان خاطرى إحنا رجالة زى بعض..الكلام ده مايطلعش برة

لآ يامحمد إحنا بنتكلم راجل لراجل..وبعدين أقولك بكل صراحة أنا بادخل على المواقع الثقافية ..دى غذاء للروح يامحمد أمال همه عاملينها ليه؟؟فسوخة يعنى؟؟

كل هذا أحاول أن يتكلم ويسرسب فى الكلام وأكتشف أبعاد هذا الغلام؟؟

والله ياعمه مش كل المواقع الثقافية بتكون جذابة إنما فيها كدة وفيها كدة

معلومة إنتزعتها وقد فاض واستفاض وصرح بأن هناك بنت فى المجاورة التى بجانبنا مطيرة النوم من عنيه ومطلعة على جتته حب العزيز..فيحاول أن يقوم بعملية تعويض فى أفلام البورنو ومشاهد اللحم المستباح..وكما يقول محمد أن هذه ألمواقع بتحل مشكلة بين الشباب ..ده إحنا مش لاقيين حاجة...هذا على لسانه بالتمام والكمال

أما عن لسانى..فالمشكلة تكمن فى التربية العقيمة التى يتربى عليها محمد وكل المحمدون..حيث الفصل التام بين البنين والبنات!!اوأن البنت كائن غامض لايمكن للأسرة أن تبوح بسنتوفة عنها..فهى عالم لا يقترب منه أو يمس..هكذا يفكر المربى الفاضل..ألأب الوقور الذى لايعلم عن هذه الحياة سوى أحاديث نبوية درسها أو سمع بها فى المسجد تحض على الفضيلة،وتطالب بألا يختلط الجنسين فى أى مكان لأن الشيطان شاطر وإذا إجتمع رجل وامرأة فالشيطان ثالثهما؟؟

مكمن الداء فى التربية التى صنعت وجهزت بل أجهزت على شباب منطقة بأسرها تعرف بالمنطقة العربية..أو صراحة بالمنطقة الكسيحة ألأسلامية وهذه هى النتيجة ولنقارن بين محمد وجورج الذى ولد فى بلاد العم سام..ياترى عنده كبت زى محمد وبيروح السيبر من وراء أبيه؟؟

ليه الشباب فى دول العالم الكافر منتجين..محافظين على تراثهم..بل محافظين على إقتناء أى أدبيات معهم فى وسائل المواصلات للقراءة المثمرة؟؟

أياأيها الميت..أيا أيها العالم ألأسلامى..أفق من غفوتك قد تتخلص من كبوتك