كل الناس عاوزاه مش عارف يعمل إيه لكنه تقلان والتقل صنعة...حزر فزر

زمان يعنى قول من أربعين سنة،وعلشان خاطر الراجل العجوز ده زود شوية،خليهم خمسين وسأكون مكارمك فى كام سنة كمان..شفت أنا كريم إزاى!!ا

كنا لسة مفاعيص فى جامعة الهنا..أمنا جامعة القاهرة..جامعة العز والبغددة..يعنى بالعربى لما تقول إن سيادتك متخرج من جامعة القاهرة..يعنى لو وزناك تلاقيك كدة وزنك قايم من غير الفروة أو الديل...إيه أنا لا سمح الله قلت حاجة غلط؟؟لامؤاخذه مفيش ناس عايشة بينا بديول؟؟لأ فيه لا تكابر أو تناطحنى بل تناصحنى أفضل فان أستطعت إقناعى أنه لايوجد فأنت رجل قليل الوجود لأنك استخدمت عقلك وقلت لى بالحق وطرحت الرأى ألآخر فأخذت به،لأنى أفكر بعقلى وليس بحذائى وياريت كل المصريين يفكروا بعقولهم..ياريت

نرجع لجامعة القاهرة..ولما يتوزن واحد خريج جامعة كفر شحاتة’،أو جامعة شلشمون مثلآ تلاقيه يوزن يادوب وأكون مكارمه كمان حوالى ربع كيلو؟؟

صدقنى أنا لاأبالغ إذا قلت لسيادتك أن خريج جامعة القاهرة -زمان- يوزن عشرين كيلو،أما صاحبنا الذى لايوجد بداخله شئ يزنه إلا ربع كيلو فأنا من كل قلبى أشفق عليه ..صدقنى أشفق عليه وأكاد أبكى على حالك يامصر ياللى الكفور والنجوع تحولت فيها مبانى المدارس الثانوية إلى "جامعات"؟؟؟؟

ماعلينا وعلى رأى الراجل إللى صدقنى مو فاكر إسمه إللى قال خلى زكيبة الهم متغطية،وأصبح قولآ مأثورآ لك أن تستخدمه ببلاش فى حياتك اليومية،أو فى تعاملاتك ألإجتماعية وكله ماشى على رأى المرحوم فؤاد المهندس فى 5 باب.ا

طيب وبعدين؟؟يعنى من خمسين سنة وأكتر ماكان شئ نقول عليه ياساتر ده كان شربة ملح إنجليزى،أو تقول داهية مايرجع؟؟

أقولك فيه لأن 100%كمال لايوجد إلا للرب فقط أما البشر فلا ولو جاب 65%يعنى تقدير جيد يبقى بطل فى ألأيام السودة دى!!ا

كان فيه أستاذ فى أول محاضرة قال  ألله يرحمه:

إسمعوا مافيش مذكرات أطبعها لكوا وكل واحد يدور على ميته تسخن..أنا مو بتاع مذكرات أو ملخصات..الكلام ده كان فى ثانوى؟؟

على عكس ألأساتذة الذين كانوا يشتركوا مع سيادة ألأستاذ المذكور من كان له كتاب يقول أو يكتب المراجع ألأجنبية،ثم فى آخر القائمة يكتب كتابه ووالله يكتبه على إستحياء؟؟!!ا

فات شهر ،قول اتنين ولا شئ فى يدنا نرجع إليه؟؟ياسنة موش فايته ياولاد..طيب هنعمل إيه؟؟

نسوق الرخامة نعمل زى الشحاتين ونقول لسيادته..يادكتور مو لاقيين حاجة نذاكر فيها يارب يخليلك الست..على رأى الشحاتين لما يكون واد فرفور شابك إيده وماشى خارج من الجامعة مع البت بتاعته إللى وعدها بالجواز من أو نظرة؟؟إبقى قابلنى أو إبقى قابلينى أهوه كلام إبن عم حديت..وحديقة ألأورمان بها متسع للجميع وعلى أيامنا ما كان فيه موبيل ولا عفريت أزرق كان فيه حاجة إسمها جوابات تدسها فى كشكول المحاضرات لها..وأنت ترتعش لكى لاأحد يراك وتبقى فضيحة بين الطلبة

آه كنا إقفال ماركة ييل..والله معاك حق

نرجع لأستاذنا الهمام فقد افتر ثغره عن إبتسامة كانت لنا بمثابة إشارة أنه يمكن يفكر..ثم يفكر ..ثم أصبح يفكر حتى تقريبآ قرب نهاية الترم وبعد إلحاح شديد قال قولآ إعتبرناه قبلة الحياة فقد وافق سيادته ويبدو أنه قد استخار الله ولوانه كان ملحد وابن كلب..المهم يامبارك قال لافض فوه..أنا مذكرتى فيها علم..ومتكلفة وعشان خاطركم هابيعها بجنيه للمذكرة؟؟

يانهار اسود؟؟جنيه طيب يمكن البعض يقدر يدفع الجنيه،ودول أولاد الذوات الذى يكون بجيبه مثلآ جنيه ونصف وده لأنه إبن راجل غنى ومن ساكنى مصر الجديدة وليس فى شارع هامفرس مثلآ أو عزبة على شريط السكة الحديد بتاع الجيزة..

بطريق أو بآخر جمعت الجنيهات وجاء اليوم الموعود لاستلام المرجع اللوذعى الذى وعدنا به ألأستاذ؟؟

ياريتنا مادفعنا وياريتنا مادفعنا ماء وجوهنا ثمنآ للذل ليوافق سيادته على طبع مذكرة

تمخض الجبل فولد فأرآ...المذكرة يامحترم 10ورقات منهم ورقة مكرره ومطبوعة على الرونيو-طبعآ لاتعرف الرونيو ولا ألآله الكاتبه-دى أشياء من مخلفات العواجيز وماتشغلش بالك خليك فى الموبيل أبو دقه على خده الشمال،أو اللى بيفوح بارفان أو بيتكلم لوحده.ا

تصور ابن اللذين..وبعد الذل ده كله نطلع ب9ورقات مكتوبين ببنط 15؟؟

الله يخرب بيتك ولا يبشبش الطوبة اللى تحت دماغ سيادتك..لكننا قرضنا قصيدة شعرية حمدآ وشكرآ لأستاذنا الهمام الذى دلق على دماغنا حلة علم ..أقسملك أنى لم أعرف بيتكلم عن إيه؟؟

أنا مدوخك ويايا لكنى أريد أن أقول حاجة ياريتك تكون فهمتها منى أصل أنا متخلف ومخى على قده ومااعرفش أتكلم إلا بالكناية

إفهمها بأه والا انت غبى =لامؤاخذه- زى الواد كمبورة اللى مدوخنى وياه

يله ياعم فسحة